‘मेट्रोपॉलिटन सिटी’च्या पदरी निराशाच

केंद्र सरकारकडून गेल्याच आठवड्यात रेल्वेचा अर्थसंकल्प मांडण्यात आला. त्यामध्ये पुणे विभागाला काही तरी मिळेल, अशी अपेक्षा होती. परंतु अर्थसंकल्प सादर होऊन सहा दिवस झाले तरी पुणे शहरासाठी त्यात कोणत्या तरतुदी झाल्या आहेत, याची माहिती अद्याप उपलब्ध होऊ शकलेली नाही. रेल्वे प्रशासनाकडे चौकशी केली, तर ‘पिंक बुक’ (टिप्पणी) अद्याप आलेली नाही, असे छापील उत्तर दिले जाते. मेट्रोपॉलिटन सिटी म्हणून ओळखल्या जाणाऱ्या पुणे शहराची ही अवस्था... याला रेल्वे प्रवाशांचे दुर्दैव म्हणावे की आणखी काय... मात्र यावरून रेल्वेचा कारभार कसा सुरू आहे, हे स्पष्ट होते.