आपल्याच मस्तीत पोलिसांची गस्त

पिंपरी : पिंपळे सौदागर पोलीस चौकीसमोरच्या शंकर मंदिराजवळ दोन मोटारी बराच वेळ थांबून असतात. मोटारीचा दरवाजा उघडा अन् आत काही लोकांची चुळबुळ सुरू असते. बरे, वेळही रात्री पावणेबारा ते पाऊणची. तेथून अवघ्या ५0 फुटांवर नाकाबंदी, तर पुढच्या ५0 फुटांवर चौकीचा दरवाजा. महिला उपनिरीक्षक आणि सात-आठ कर्मचारी म्हणायला कर्तव्यावर; परंतु एकाच्याही मनात संशयाची पाल चुकचुकत नाही, हे विशेष. आपल्याच मस्तीत गस्त घालणार्‍या अशा पोलिसांच्या जिवावर शहराची सुरक्षा असल्याचे वास्तव लोकमत प्रतिनिधींनी केलेल्या पाहणीत उघडकीस आले.