Sunday 16 March 2014

अनधिकृत फलकांविरुद्ध आयुक्तांचे कारवाईचे आदेश

स्टीकर्स, बॅनर्स आणि अनधिकृत फलक यामुळे शहराच्या सौदर्यात बाधा येऊ नये म्हणून सातत्याने अतिक्रमण विरोधी विभागाने कारवाई करावी, अशी  सूचना आयुक्त राजीव जाधव यांनी दिल्या. याबाबत लवकरच संबंधित अधिका-यांचे प्रशिक्षण घेण्यात येणार असल्याचे ते म्हणाले.
आज (शनिवार) सकाळी आठवाजल्यापासून 'फ'  क्षेत्रीय कार्यालयांतर्गत येणा-या भागाची त्यांनी पाहाणी केली. त्यानंतर झालेल्या अधिका-यांच्या बैठकीत ते बोलत होते.  यमुनानगर येथून पाहणी दौ-याला प्रारंभ झाला. त्यानंतर साईनाथनगर, श्रमिकनगर परिसर, रुपीनगर, गणेशनगर, तळवडे, संभाजीनगर येथून उद्यमनगर या परिसराची आयुक्तांनी पाहाणी केली.

शहरात 11 हजार बेकायदेशीर 'फ्लेक्स'वर कारवाई

लोकसभा निवडणुकीच्या आचारसंहितेमुळे महापालिकेने शहरातील रस्त्या-रस्त्यावर लागलेल्या अनधिकृत फलकांवर कारवाईची मोहीम हाती घेतली आहे. चालु महिन्यात महापालिकेच्या आकाशचिन्ह व परवाना विभागाने शहरातील सुमारे 11 हजार 166 फलकांवर कारवाई केली आहे, अशी माहिती सहायक आयुक्त सतीश कुलकर्णी यांनी आज (शनिवारी) दिली.
महापालिकेच्या आकाशचिन्ह व परवाना विभागाने 1 ते 14 मार्च या कालावधीत बेकायदेशीर फ्लेक्सबाजी हटविण्याची मोहीम हाती घेतली. त्यामध्ये शहरातील सर्व भागात कारवाई करण्यात आली असून  सुमारे 11 हजार 166 फलकांवर महापालिकेने कारवाईचा बडगा उगारला आहे.

पिंपरीत ४0७, चिंचवडला ४२३ केंद्रे

पिंपरी : मावळ लोकसभा निवडणुकीची रणधुमाळी सुरू झाली आहे. नेते प्रचाराच्या आखणीत मग्न असताना निवडणूक विभागही व्यस्त झाला आहे. नवीन मतदारांसह पुरवणी याद्या तयार करणे, दुबार नावे काढणे, यासह परिसरानुसार मतदान केंद्रे, स्ट्राँग रूम, त्याचे नकाशे बनविण्याचे काम सुरू आहे. चिंचवड विधानसभा क्षेत्रात ४२३, तर पिंपरी विधानसभा मतदारसंघात ४0७ मतदान केंद्र असणार आहेत. नवीन याद्या अपडेट केल्यानंतर ही संख्या वाढेल, असे निवडणूक आयोगाचे म्हणणे आहे. 

पर्यावरण जागृतीसाठी निगडीत सायकल फ़ेरी

पिंपरी-चिंचवड उद्योगजकता क्लबतर्फ़े पर्यावरण जागृतीसाठी रविवारी (दि. 16)  13 किलोमीटर अंतराची प्रेरणादायी सायकल  फ़ेरी काढण्यात येणार आहे.  या उपक्रमाचे उदघाटन पुणे सायकल प्रतिष्ठानचे संस्थापक जुगल राठी यांच्या हस्ते सकाळी सहा वाजता निगडी येथे भक्ती-शक्ती चौकात होणार आहे.
ही सायकल फ़ेरी भक्ती-शक्ती चौकातून निघून बिजलीनगर चौक, चापेकर चौक, पिंपरी कँप, डॉ. आंबेडकर चौक पिंपरी, चिंचवड स्टेशन मार्गे परत भक्ती-शक्ती चौकात या फेरीचा समारोप होणार आहे. सर्वांना या सायकल फेरीमध्ये सहभाग घेता येईल. मात्र, त्यासाठी नावनोंदणी आवश्यक आहे अशी माहिती उद्योगजकता क्लबचे अध्यक्ष विनय चंद्रात्रे यांनी दिली आहे.

चिंचवडमध्ये वेल्डिंग तंत्रज्ञान प्रशालेचे उद्‌घाटन

लॉर्श वेल्डिंग प्रॉडक्ट्स प्रायव्हेट लिमिटेड  व डॉन बॉस्को व्यावसायिक प्रतिष्ठान यांच्या संयुक्त विद्यमाने सुरू करण्यात आलेल्या 'लॉर्श-डॉन बॉस्को वेल्डिंग टेक्नॉलॉजी स्कूल ऑफ एक्सलन्स'  या  वेल्डिंग तंत्रज्ञान प्रशालेचे उद्‌घाटन झाले.
यावेळी इंडो-जर्मन चेंबर ऑफ कॉमर्सचे सरसंचालक बेर्नहार्ड स्टाईनरूक, लॉर्श वेल्डिंग प्रॉडक्टस्चे व्यवस्थापकीय संचालक इंद्रजीत मुखर्जी, लॉर्श समुहाचे जागतिक अध्यक्ष वुल्फगांग ग्रुब, विक्री संचालक कॅटॅल्डो स्पोसॅटो, मुंबई डॉन बॉस्को डेव्हलपमेंट प्रॉव्हिन्सचे कार्यकारी संचालक फादर सॅव्हिओ सिल्व्हेरा, फादर एल्सन बॅरेट्टो, कोर्लिस गोन्सालविस आदी उपस्थित होते.

निगडी जकात नाक्याजवळ टॅकरमधून अ‍ॅसिड गळती

अ‍ॅसिड गळती सुरूच, थांबवणे अशक्य
पुणे-मुंबई महामार्गावरून हॅड्रोकोलीक अ‍ॅसिड घेऊन जात असलेल्या टॅकरमधून अचानक अ‍ॅसिड गळती होऊ लागली आहे. टॅकर मोकळ्या मैदानात उभा करण्यात आला असून गळती थांबविण्यास अग्निशमन दलाला यश आलेले नाही. अ‍ॅसिडचा उग्र वास परिसरात पसरल्याने भितीचे वातावरण निर्माण झाले आहे. हा प्रकार निगडी जकातनाक्याजवळ आज (शनिवारी) सकाळी आठच्या सुमारास घडला.

पिंपरीमध्ये बैठकांवरच भर

पिंपरी : राष्ट्रवादीच्या उमेदवारीचा घोळ सुरू असताना आणि शेतकरी कामगार पक्षाकडून उमेदवारी घ्यायची की नाही, याबाबत लक्ष्मण जगताप यांनी भूमिका जाहीर केली नसताना प्रचार मात्र सुरू केला आहे. जगताप यांनी पिंपरी गावठाणात बैठक घेतली. यामध्ये प्रचार यंत्रणेचे नियोजन केले. 

राष्ट्रवादीकडून पानसरे यांची चाचपणी

पिंपरी : राष्ट्रवादी काँग्रेस पक्षश्रेष्ठींवर आगपाखड करून दहा दिवसांपूर्वी काँग्रेसवासी झालेले माजी महापौर आझम पानसरे यांच्याशी शनिवारी केंद्रीय कृषिमंत्री शरद पवार व उपमुख्यमंत्री अजित पवार यांनी संपर्क साधल्याचे वृत्त आहे. 

ग्वाही दादांना, पण ओढ भाऊंची

पिंपरी : शेकापच्या पाठिंब्यावर निवडणूक लढण्यास सज्ज झालेल्या आमदार लक्ष्मण जगताप यांच्यासाठी पेण येथील मेळाव्यासाठी पिंपरी-चिंचवड शहरातून १२५ आराम बस धावल्या. सुमारे पाच हजार कार्यकर्ते त्या मेळाव्यासाठी रवाना झाले. त्याचा परिणाम थेरगावात झालेल्या पक्षाच्या मेळाव्याच्या उपस्थितीवर जाणवला. 

आमदार जगतापांची भूमिका ठरेना

पिंपरी : उपमुख्यमंत्री अजित पवार यांचे निकटवर्तीय आमदार लक्ष्मण जगताप यांनी मावळ लोकसभा निवडणुकीत बंडाचे निशाण फडकावल्याने राष्ट्रवादीला मोठा ताप झाला आहे. आमदार जगताप शेकापच्या चिन्हावर लढणार की पाठिंबा घेणार? याबाबत अद्यापही निर्णय झालेला नाही. परिणामी राष्ट्रवादीकडून उमेदवारी देण्यात होणारी चालढकलीबाबत उलटसुलट चर्चा सुरू आहे. आमदारांचे बंड राष्ट्रवादीच्या पाठिंब्याने तर नाही ना? पक्ष चालढकल का करतोय? अशा चर्चेला उधाण आले आहे.

इंटरनेटच्या प्रसारानंतर देश महासत्ता

पिंपरी : जोपयर्ंत संगणक- इंटरनेट सर्वसामान्यांपयर्ंत पोहचत नाही, तोपयर्ंत देश महासत्ता होणार नाही, असे मत आयटी तज्ञ व लेखक डॉ.अच्युत गोडबोले यांनी शनिवारी व्यक्त केले.
निगडी येथील पिंपरी चिंचवड अभियांत्रिकी महाविद्यालय आयोजित ‘स्पेक्ट्रम-१४’ च्या उद्घाटनप्रसंगी ते बोलत होते. या वेळी उद्योजक दिलीप धोपावकर, पिं.चिं.एज्युकेशन ट्रस्टचे कार्यकारी संचालक प्रा.गिरिश देसाई, प्राचार्य अजय फुलंबरकर, समन्वयक प्रा.प्रांजल जोग, विद्यार्थी प्रतिनिधी प्रमोद सोनवणे आदी उपस्थित होते.