नगरसेवकांच्या स्वीय सहाय्यकांसाठी कार्यशाळा घ्या ः संदीप वाघेरे

पिंपरी चिंचवड ः पिंपरी चिंचवड महापालिकेतील नगरसेवकांच्या स्वीय सहाय्यकांना महापालिकेच्या कामकाजाविषयी अधिक माहिती व्हावी, यासाठी विधिमंडळाच्या धर्तीवर एक दिवसीय अभ्यास वर्गाचे आयोजन करण्याची मागणी नगरसेवक संदीप वाघेरे यांनी केली आहे. याबाबत आयुक्त श्रावण हर्डीकर यांना निवेदन देण्यात आले आहे. त्यात वाघेरे यांनी म्हटले आहे की, पिंपरी चिंचवड महापालिका नगरसेवकांच्या कार्यालयात स्वीय सहायकांचा सक्रिय, अनमोल, महत्वाचा वाटा असतो. स्वीय सहाय्यक हे लोकप्रतिनिधींना समस्या मुक्त करण्यासाठीचे विस्तारित हात, कान, आणि डोळे असतात. त्यांच्या महत्वपूर्ण मदतीमुळे लोकप्रतिनिधींना आपले काम शिस्तबद्धपणे करणे सोपे जाते.