गटनेत्यांमुळे मनसेच्या प्रतिमेला धक्‍का

पिंपरी – दुकानांवरील मराठी पाट्यांचा मुद्दा उचलून मुंबईतील परप्रांतियांना घाम फोडणाऱ्या महाराष्ट्र नवनिर्माण सेनेचे पिंपरी-चिंचवड शहरातील अस्तित्व संपत चालले आहे. पिंपरी-चिंचवड महापालिकेत मनसेचा एकच नगरसेवक असल्याकारणाने पक्षाध्यक्ष राज ठाकरे यांनी त्यांना पक्षाचे सर्वाधिकार बहाल केले. मात्र, या नगरसेवकाकडून हे अधिकार धाब्यावर बसविले जात असल्याने पक्षासह ठाकरेंच्या प्रतिमेला धक्का पोहोचत आहे. सत्ताधारी भाजप आणि शिवसेनेच्या विरोधात भूमिका घेऊन पक्षाचे अस्तित्व टिकवून ठेवण्याची जबाबदारी खांद्यावर असताना हा नगरसेवक मात्र, सत्ताधारी पदाधिकाऱ्यांच्या केबिनमध्ये बसून “मांडवली’ करत असल्याची चर्चा आहे. त्याचा फटका पक्षाला आगामी विधानसभा निवडणुकीत बसण्याची भिती कार्यकर्ते व्यक्त करत आहेत