आता पिंपरी पालिकाच लावणार आजी-माजी नगरसेवकांच्या नावांच्या पाट्या

पिंपरीः पिंपरी-चिंचवडमध्ये अनधिकृत बांधकामाच्या जोडीने अनधिकृत फ्लेक्‍सचाही प्रश्न गंभीर आहे. त्याबाबत मुंबई उच्च न्यायालयाने पालिकेला फटकारलेही आहे. न्यायालयीन आदेश असूनही वरवरची कारवाई होत असल्याने शेकडो नव्हे, तर हजारो फलक शहरात आजही आहेत. त्यामुळे स्वच्छकडून स्मार्टकडे वाटचाल सुरू केलेल्या शहराच्या सौंदर्याला बाधा पोचते आहे. त्यात आता पालिका प्रशासनच आणखी 266 फलक पाच वर्षासाठी उभारून भर टाकणार आहे. पालिकेचे विद्यमान नगरसेवक व पदाधिकाऱ्यांच्या जोडीने माजी नगरसेवक व पदाधिकारी यांच्याही नावाचे फलक त्यांच्या निवासस्थानाजवळ लावण्याचा निर्णय पालिकेने घेतलेला आहे.