स्मार्ट सिटी’तील करमणूक फुकाची! यांची यत्ता कंची?

गेल्या दोन-तीन महिन्यांचा आढावा घेतला, तर पिंपरी-चिंचवडमधील या राजकारण्यांना तुमची ‘यत्ता कंची’ असे विचारण्याची वेळ आली आहे. कारण महापालिकेत डुकर, कुत्रे, घुबड घेवून नगरसेवक येवू लागले आहेत. हे कमी आहे म्हणून की काय आमदार आणि खासदारही बेताल झाले आहेत. ‘शहराचा विकास गेला चुलीत, आपल्या प्रसिध्दीचे ढोल वाजत राहिले पाहिजेत’ असा ‘स्वच्छ हेतू’ सर्वांचा आहे. त्याचमुळे ‘बदनाम ही सही, नाम तो पहचानासा हो गया ना…!’ अशी त्यांची भूमिका आहे. दुर्दैवाने या शहरात अशा वाचाळवीर, बोलभांडांना जाब विचारणारी माणसं किंवा संघटना नाहीत. याचमुळे सगळी वाट लागली आहे.