भोसरीत शिकाऊ वाहनचालकांसाठी अद्ययावत ट्रॅक

भोसरीत शिकाऊ वाहनचालकांसाठी अद्ययावत ट्रॅक: पिंपरी । दि. १५ (प्रतिनिधी)

नवशिक्या वाहनचालकांना रस्त्यावरील आव्हानांचा अंदाज ट्रायल देतेवेळीच यावा, असा अद्ययावत ट्रॅक उपलब्ध करून देण्यात आला आहे. एकाच ठिकाणी बोगदा, वळणाकार रस्ता, चढ-उतारावर वाहन चालविण्याची कसरत करावी लागणार असल्याने सफाईदारपणे वाहन चालविण्यासाठी चालकांना त्याची मदत होणार आहे.

वाहन चालविण्याचा परवाना मिळविण्यापूर्वी नवशिक्यांना वाहतूक निरीक्षकांसमोर वाहन चालवून दाखविणे बंधनकारक आहे. पूर्वी मोशी प्राधिकरणातील मोकळ्या रस्त्यावर त्यांना ट्रायल द्यावी लागत होती. परंतु तेथे सरळ रस्ता असल्याने नवशिके बिनदिक्कतपणे वाहन चालवीत असत. परंतु सफाईदारपणे वाहन चालविता यावे यासाठी ते पुरेसे नव्हते. म्हणून नवनगर विकास प्राधिकरणाच्या साडेसहा एकर जागेत अद्ययावत ट्रॅक विकसित करण्यात आला आहे.