मोबाइलवर अश्लील एसएमएस, संभाषण

मोबाइलवर अश्लील एसएमएस, संभाषण: - महिला वर्षभरापासून हैराण
पिंपरी । दि. ७ (प्रतिनिधी)

वर्षभरापासून वेगवेगळ्या मोबाइल क्रमांकावरून तिला अश्लील एसएमएस येताहेत. कुणीतरी अश्लील भाषेत संवाद साधून हैराण करतोय. यामुळे तिचा संसार उद्ध्वस्त होऊ पहात आहे. आरोपीला अटक करावी म्हणून ती चिंचवड पोलिसांचे उंबरे झिजवित आहे. पण उपयोग शून्य. माझ्यावर आत्महत्येची वेळ आली आहे, अशी कैफियत तिने चिंचवडच्या वरिष्ठ पोलीस अधिकार्‍यासमोर मांडली. त्यानेही तिच्या व्यथेची कुचेष्ठा केली. त्यामुळे ही महिला हताश झाली आहे. मला न्याय हवा,अशी याचना ती करते आहे.

चिंचवडमध्ये राहणारी ही महिला पिंपरीत राशीरत्न विक्रीचा व्यवसाय करते. २६ एप्रिल २0१२ रोजी तिला पहिल्यांदा अनोळखी क्रमांकावरून फोन आला. अश्लील भाषेत बोलत तिला भेटायला बोलावले. नाही आलीस तर जिवे मारीन असे धमकावले. फोन येणे सुरूच राहिल्याने ती घाबरली. ६ मे रोजी तिने चिंचवड पोलिसांत तक्रार दिली. तरीही वेगवेगळ्या क्रमांकांवरून फोन आणि एसएमएस सुरूच होते. तिने त्या सर्व क्रमांकांसह ५ जूनला पुन्हा तक्रार दिली. पण बघू, शोधू अशी वरवरची उत्तरे तिला ऐकावयास मिळाली.