वासराच्या विरहाने गायीचे रौद्ररुप!

• पिंपरी वाघेरे येथील घटना : बचावासाठी नागरिकांची धडपड

पिंपरी, (प्रतिनिधी) – पिंपरी वाघेरे येथील सुखवानी सिटी समोरील जयहिंद शाळा ते पिंपरी वाघेरे गावात जाणाऱ्या रस्त्यावर नेहमीच रहदारी असते. पिंपरी ते काळेवाडी जोडणाऱ्या मुख्य रस्त्यावर मोकाट गायींचे कळप दिवस-रात्र ठिय्या मांडून असतात. मंगळवार दि. 5 ला सकाळी साडेअकराच्या सुमारास गायींच्या कळपातील वासरू गायब झाले. त्यामुळे गायीने हंबरडा फोडला. याला वाहन चालकच कारणीभूत आहेत, असा समज झाला. चिडलेल्या गायीने पिंपरी वाघेरे परिसरात भर रस्त्यावर हाहा:कार माजवला. वाहन चालकांचा अक्षरशः पाठलाग करण्यास सुरुवात केली. गायीने दिसेल त्या वाहनांचा दूरपर्यंत पाठलाग केला. यामुळे दोन दुचाकी एकमेकांवर जोरात आदळल्या. कोणालाही दुखापत झाली नसली, तरी 15 ते 20 मिनिटे वाहतूक थांबली. रस्त्याच्या दोन्ही बाजुला गाय उधळत होती. गायीचे रौद्ररुप पाहून वाहन चालक जागीच थांबून स्वतःचा बचाव करीत होते.