कुदळवाडीत भंगाराची सात गोदामे खाक

चिखली - कुदळवाडी येथे मंगळवारी मध्यरात्री लागलेल्या आगीत भंगार मालाची सात गोदामे जळून खाक झाली. आग लागलेल्या गोदामाशेजारीच ऑइलची कंपनी होती. या कंपनीच्या मागच्या भागालाही आग लागली. मात्र अग्निशामक दलाच्या जवानांनी जिवाची बाजी लावून प्रथम कंपनीला लागलेली आग विझविली. त्यामुळे मोठा अनर्थ टळल्याचे नागरिकांचे म्हणणे आहे. दरम्यान, अग्निशामक दलाच्या जवानांनी पाच बंब व स्थानिक नागरिकांचे पाण्याचे दहा टॅंकरच्या साह्याने भंगार मालाच्या गोदामाला लागलेली आग बुधवारी पहाटे आटोक्‍यात आणली.