अखेर वारकऱ्यांना भेटवस्तूचा निर्णय झालाच; ताडपत्री किंवा तंबू देण्यास गटनेत्यांच्या बैठकीत ‘शिक्कामोर्तब’

पिंपरी (Pclive7.com):- गेल्या काही दिवसांपासून वारकऱ्यांना देण्यात येणाऱ्या भेटवस्तूवरून विरोधकांनी सत्ताधारी भाजपला चांगलेच धारेवर धरले होते. भेटवस्तू देण्याची परंपरा बंद करणारे भाजपवाले नास्तिक असल्याचा आरोप देखील होत होते. सर्वच स्तरातून होत असलेल्या टिकेमुळे सत्ताधाऱ्यांनी आज सर्व गटनेत्यांची तातडीची बैठक बोलावली होती. या बैठकीत वारकऱ्यांना भेटवस्तू देण्यावर अखेर शिक्कामोर्तब करण्यात आले. प्रशासकीय स्तरावर शक्य न झाल्यास सर्व नगरसेवकांच्या मानधनातून ताडपत्री किंवा तंबू ही उपयोगी असणारी वस्तू वारकऱ्यांना भेट स्वरूपात देण्याचा निर्णय झाला असल्याचे महापौर नितीन काळजे यांनी यावेळी जाहिर केले.