तलवारीने वार केल्याने निगडीत दोघे जखमी

तलवारीने वार केल्याने निगडीत दोघे जखमी: पिंपरी । दि. ९ (प्रतिनिधी)

मित्राच्या पत्नीला छेडल्याचा जाब विचारल्याने दोघा तरुणांवर तीन गुंडांनी तलवारीने हल्ला करून जीवे मारण्याचा प्रयत्न केला. ही घटना निगडी येथील टिळक चौकात रात्री साडेअकराच्या सुमारास घडली. या प्रकरणी तिघा हल्लेखोरांना पोलिसांनी अटक केली.

विनोद सोपान काळभोर (वय २२, सुदर्शननगर, आकुर्डी) व सत्यवान रामबापू राम (२१, यमुनानगर, निगडी) ही गंभीर जखमींची नावे असून, त्यांच्यावर रुग्णालयात उपचार सुरू आहेत. रणजित बापू चव्हाण (१९), राकेश बाळासाहेब गंगावणे (१९) व आकाश नवनाथ कसबे (१८, सर्व रा. दळवीनगर, चिंचवड) ही आरोपींची नावे आहेत.

पत्नीस आणण्यासाठी काळभोर मित्रासह टिळक चौकात आले होते. त्या वेळी तिघा तरूणांनी महिलेची छेड काढली. वादावादी होऊन तिघांनी तलवारीने हल्ला करून काळभोर व राम यांना जीवे मारण्याचा प्रयत्न केला. तिघांना अटक करून पोलिसांनी न्यायालयात हजर केले असता १३ डिसेंबरपर्यत पोलीस कोठडी देण्यात आली आहे.