स्थायी’साठी गडकरी-मुंडे गटाची एकजूट

पिंपरी-चिंचवड महापालिकेची ‘अर्थ’कारणाची ‘गुरुकिल्ली’ असलेल्या स्थायी समितीची सूत्रे ताब्यात ठेवण्यासाठीही सत्ताधारी भाजपमधील जुन्या गटाने (गडकरी-मुंडे) जोरदार ‘लॉबिंग’ केले आहे. विद्यमान समितीला आता जास्त कामे देऊ नका; आमच्यासाठी कामे शिल्लक ठेवा...असा दम काही नगरसेवक-पदाधिकारी महापालिका अधिकार्‍यांना भरत आहेत. विशेष म्हणजे, ज्येष्ठ नगरसेवक विलास मडीगेरी यांना ‘अध्यक्ष’ बनवण्यासाठी जुन्या गटातील मतभेद विसरून ‘नेते’ कामाला लागले आहेत. दरम्यान, स्थायी समितीसाठी सुरु असलेल्या रस्सीखेचमुळे पंतप्रधान आवास, ‘वेस्ट टू एनर्जी’ आदी प्रकल्पांना खोडा घालण्याचा प्रयत्न जाणीवपूर्वक केला जात आहे. याला भाजपमधील ‘नेते’च खतपाणी घालत आहेत.