चिंचवड-केशवनगर येथे वाहतूक कोंडी

पिंपरी - चिंचवड-केशवनगर येथे क्राँक्रीट रस्त्याच्या कामासाठी महापालिका शाळेपासून पुढे एकेरी मार्ग करण्यात आला आहे. मात्र, येथून सर्रास दुहेरी वाहतूक सुरू आहे. त्यामुळे येथे सध्या वाहतूक कोंडी नित्याचीच झाली आहे. 
केशवनगर हा दाट लोकवस्तीचा भाग आहे. महापालिकेतर्फे येथून काळेवाडी पुलापर्यंत क्राँक्रिट रस्ता करण्याचे काम सध्या सुरू आहे. केशवनगर महापालिका शाळेपासून (अभिनव चौक) पुढे कुणाल इस्टेटपर्यंत रस्त्याचे काम चालू आहे. या रस्त्यावर काळेवाडी पुलाकडून चिंचवडला येणारी एकेरी वाहतूक सुरू आहे. केशवनगरकडून काळेवाडीला महापालिका मराठी शाळेपासून, काकडे टाऊनशिप, मोरया गोसावी क्रीडा संकुल, कुणाल इस्टेट अशी वाहतूक वळविण्यात आली आहे.