शंकर आवताडे यांनी स्विकारला चिखली पोलिस स्टेशनचा पदभार

चौफेर न्यूज – चिखली, कुदळवाडी आणि जाधववाडी परिसरातील वाढत्या गुन्हेगारीला रोखण्यासाठी या परिसरात स्वतंत्र पोलीस ठाणे सुरु करण्यात येणार आहे. यासाठी पुणे पोलीस आयुक्तालयाने गुरुवारी (दि. 26) दहा पोलीस निरीक्षकांच्या बदल्यांचे आदेश काढले. त्यामध्ये चिखली पोलीस ठाण्याचे वरिष्ठ पोलीस निरीक्षक म्हणून शंकर आवताडे यांची नियुक्ती करण्यात आली आहे. शंकर आवताडे चिखली पोलीस ठाण्याचे पहिले वरिष्ठ पोलीस निरीक्षक म्हणून पदभार स्वीकारणार आहेत. चिखली पोलीस ठाण्यात निगडी आणि भोसरी एमआयडीसी पोलीस ठाण्याच्या हद्दीतील काही भाग देण्यात येणार असून या दोन पोलीस ठाण्यांमधून आणि पोलीस मुख्यालयाकडून फौजफाट्याची गरज भागवली जाणार आहे. शासकीय पातळीवर पोलीस ठाण्यास मान्यता मिळाली असून चिखली येथील महापालिकेच्या शाळेच्या इमारतीत हे नवीन पोलीस ठाणे सुरू होण्याची शक्‍यता आहे. मात्र अद्याप याबाबत कोणतीही अधिकृत माहिती मिळालेली नाही.