राजकीय हस्तक्षेपाला जुमानणार नाही

राजकीय हस्तक्षेपाला जुमानणार नाही: पिंपरी । दि. ११ (प्रतिनिधी)

गणेश मंडळे आणि त्यांच्या कार्यकर्त्यांवर खटले दाखल करण्यात पोलिसांना स्वारस्य नाही. यंदाच्या गणेशोत्सवात अदखलपात्र गुन्हा दाखल व्हावा, असे कृत्यदेखील आपल्या हातून घडणार नाही, असा संकल्प कार्यकर्ते आणि पदाधिकार्‍यांनी करावा, असे आवाहन पोलीस आयुक्त गुलाबराव पोळ यांनी मंगळवारी केले. गुन्हा दाखल करण्याची वेळ आमच्यावर आलीच तर त्या वेळी राजकीय पदाधिकार्‍यांचा हस्तक्षेप खपवून घेतला जाणार नाही, असा इशाराही त्यांनी दिला.

पिंपरी महापालिका आणि पुणे पोलीस आयुक्तालय परिमंडल तीनच्या वतीने गणेश मंडळासाठी आयोजित शांतता बैठकीत ते बोलत होते. संत तुकारामनगर येथील आचार्य अत्रे रंगमंदिरात झालेल्या बैठकीत पोळ म्हणाले, ‘‘गणेशोत्सवाच्या एक दिवस आधी जनरल वैद्य यांच्या मारेकर्‍यांना पिंपरीतच पकडण्यात आल्याचे मला आठवते. सध्या साखळी बॉम्बस्फोटांमुळे नागरिकांत भीतीचे वातावरण आहे. गणेशोत्सवाच्या आधीच बॉम्बस्फोटातील अतिरेकी पकडण्यात यश आले, तर आपणा सर्वांना गणपतीबाप्पा पावला असे म्हणता येईल. नागरिकांत जागरूकता निर्माण व्हावी, यासाठी सुरू असलेल्या प्रयत्नांची यादीच त्यांनी येथे सांगितली.