शरद पवारांवर गुन्हे नाहीत

शरद पवारांवर गुन्हे नाहीत: - पुणे पोलिसांचा दिल्ली पोलिसांना खुलासा
पुणे। दि. १३ (प्रतिनिधी)

सर्वोच्च न्यायालयात सरंक्षित व्यक्तींविषयीची माहिती देण्यासाठी दिल्ली पोलिसांनी माहिती मागविली असून, केंद्रीय कृषी मंत्री शरद पवार यांच्याविरुद्ध गुन्हे दाखल नाहीत, असे पुणे पोलिसांनी आज सांगितले.

पवार यांच्यावर पुणे व पिंपरी परिसरातील पोलीस ठाण्यांमध्ये दाखल असलेल्या गुनंची सविस्तर माहिती तातडीने पाठवावी, असा फॅक्स दिल्ली पोलिसांनी पुणे पोलिसांना केला होता. त्यानुसार शहरातील सर्व पोलीस ठाण्यांमधून १२ मार्च रोजी दुपारपर्यंत माहिती देण्याचे आदेश देण्यात आले होते. याबाबत पोलिसांनी सांगितले, की नवी दिल्लीचे पोलीस उपायुक्त यांच्याकडून ९ मार्चला एक फॅक्स मिळाला होता. त्यात सर्वोच्च न्यायालयात संरक्षित व्यक्तींना पुरविण्यात येणार्‍या संरक्षणासंदर्भात माहिती सादर करावयाची असल्याने शरद पवार यांच्याविरुद्ध पुणे शहरामध्ये गुन्हे दाखल आहेत अगर कसे याविषयी तात्काळ माहिती पाठविण्याबाबत कळविण्यात आले होते. पवार यांच्याविरुद्ध गुन्हे दाखल नाहीत, अशी माहिती दिल्ली पोलिसांना कळविण्यात आली असल्याचे पुणे पोलिसांतर्फे सांगण्यात आले.