आमदार बाबर साडेतीन वर्षांपासून फरार!

आमदार बाबर साडेतीन वर्षांपासून फरार!: पुणे । दि. २२ (प्रतिनिधी)

शिवसेनेचे आमदार महादेव बाबर हे गेल्या साडेतीन वर्षापासून फरार असल्याची धक्कादायक माहिती हवेली पोलिसांनी न्यायालयास दिली आहे. निवडणुकीच्या वादातून कोंढवा येथील एका शेतकर्‍याला दमदाटी व व शिवीगाळ केल्याचा गुन्हा त्यांच्यावर दाखल आहे. याप्रकरणी त्यांनी अटकपूर्व जामीन मिळण्यासाठी केलेला अर्ज सत्र न्यायालयाने फेटाळून लावला.

शेतकरी राजेंद्र बबन लोणकर (वय ४९, रा. कुबेरा पार्क, लुल्लानगर, कोंढवा) यांच्या कार्यालयामध्ये १२ ऑक्टोबर २00९ रोजी ८ ते १0 जणांच्या जमावाने बेकायदेशीरपणे घुसून त्यांना दमदाटी व शिवीगाळ केली. तसेच त्यांच्या कार्यालयाची मोडतोड करण्यात आली. याप्रकरणी आमदार बाबर यांच्यासह ७ जणांविरूध्द हवेली पोलीस ठाण्यात गुन्हा दाखल करण्यात आला. मात्र हवेली पोलिसांनी आमदार बाबर यांना अटक केलीच नाही.