ठाण मांडलेल्या पाच अधिकार्‍यांच्या बदल्या

ठाण मांडलेल्या पाच अधिकार्‍यांच्या बदल्या: पिंपरी । दि. २२ (प्रतिनिधी)

अनेक वर्षे एकाच जागी ठाण मांडलेल्या महापालिकेच्या ५ अधिकार्‍यांची बदली आयुक्त डॉ. श्रीकर परदेशी यांनी केली. त्यात बांधकाम परवानगी विभागातील उपशहर अभियंता वसंत काची, जलनि:सारण विभागाचे उपशहर अभियंता आयुबखान पठाण आणि तीन कार्यकारी अभियंत्यांचा समावेश आहे. राजकीय वरदहस्त असणार्‍यांची उचलबांगडी केल्याने अन्य अधिकार्‍यांचे धाबे दणाणले आहेत.

तीन वर्षे सेवा झाल्यानंतर अधिकारी व कर्मचार्‍यांची अन्य विभागांत बदली करणे कायद्याने बंधनकारक आहे. मात्र, हा कायदा धाब्यावर बसवून सुमारे दीड हजार अधिकारी, कर्मचारी वर्षानुवर्षे एकाच विभागात काम करीत होते. नगरसेवक व राजकीय पदाधिकार्‍यांच्या मर्जीतील असल्याने अनेक अधिकार्‍यांच्या बदल्या होत नव्हत्या.