भाजपचे संपर्कप्रमुख एकनाथ पवार यांना पोलिसांकडून धक्काबुक्की

जमावबंदी आदेशाचा भंग केल्याप्रकरणी पोलिसांकडून कारवाई

शालेय विद्यार्थ्यांच्या प्रवेश फी वाढीसंदर्भात शाळा व्यवस्थापनाशी चर्चा करण्यासाठी गेलेले भारतीय जनता पक्षाचे पश्चिम महाराष्ट्र संपर्कप्रमुख एकनाथ पवार आणि पोलीस यांच्यात शाब्दिक चकमक झाल्याने वादावादी झाली. याचे रुपांतर धक्काबुक्कीत झाल्याने परिसरात तणावाचे वातावरण निर्माण झाले होते. हा प्रकार भोसरी येथील इंद्रायणीनगर मधील प्रियदर्शनी इंग्लिश मिडियम स्कूलमध्ये आज (शुक्रवारी) सकाळी साडेदहाच्या सुमारास घडला. या प्रकरणी एमआयडीसी पोलीस ठाण्यात जमावबंदीच्या आदेशाचा भंग केल्याप्रकरणी एकनाथ पवार यांच्यावर प्रतिबंधात्मक कारवाई करुन त्यांना सोडून देण्यात आले.