महामार्ग ताब्यात घेण्यासाठी दोन्ही पालिका राजी!

• पुणे आणि पिंपरी-चिंचवड महापालिकेची तयारी
• 850 दुकानांतून दारू विक्री पुन्हा सुरू होणार

पुणे – पुणे शहरातून जाणारे मात्र राष्ट्रीय आणि राज्य महामार्ग असलेले रस्ते महापालिकेच्या ताब्यात घेण्याची तयारी पुणे आणि पिंपरी-चिंचवड महापालिकेने दर्शविली आहे. त्यामुळे हे रस्ते महापालिकेच्या ताब्यात आल्यास या महामार्गाच्या 500 मीटर परिसरात असलेल्या दारू विक्रेत्यांची दीड महिन्यापासूनचे शटर पुन्हा उघण्याचा मार्ग मोकळा होणार आहे. दरम्यान, दारू विक्रेत्यांची बार लॉबी आणि गल्लीपासून दिल्लीपर्यंत एकहाती सत्ता असलेल्या भाजपच्या दबावाने झिंग चढल्याने महापालिकेने हा निर्णय घेतल्याची जोरदार चर्चा सुरू आहे.