पहिल्या टप्प्यातच मेट्रो निगडी ते कात्रजपर्यंत व्हावी; चिंचवड प्रवासी संघाची मागणी

चिंचवड- पहिल्या टप्प्यातच मेट्रो निगडी ते कात्रजपर्यंत व्हावी यासाठी केंद्रीय रस्ते आणि महामार्ग मंत्री नितीन गडकरी यांना चिंचवड प्रवासी संघाच्यावतीने मागणीचे निवेदन चिंचवड येथील प्रा. रामकृष्ण मोरे प्रेक्षागृहात देण्यात आले. चिंचवड प्रवासी संघाच्यावतीने पिंपरी चिंचवड व पुणे महानगरपालिका क्षेत्रातील नागरिकांच्या सोयीसाठी ही मागणी मान्य करावी, असे प्रवासी संघाच्यावतीने सांगितले. यावेळी निवेदन देताना चिंचवड प्रवासी संघाचे अध्यक्ष गुलामअली भालदार, संघाचे मुकेश चुडासमा, निर्मला माने, शरद चव्हाण, नंदु भोगले आदी उपस्थित होते. केंद्रीय मंत्री, पंतप्रधान नरेंद्र मोदी, मुख्यमंत्री देवेंद्र फडणवीस, पालकमंत्री गिरीश बापट, मेट्रो रेल कॉर्पोरेशनचे अधिकारी, जिल्ह्यातील सर्व खासदार, राज्यसभा सदस्य, आमदार, पिंपरी-चिंचवड व पुणे महापालिकेचे आयुक्त यांना या निवेदनाची प्रत देण्यात येणार आहे.