१३ महिन्यांच्या मुलीला हाडे मोडेपर्यंत मारहाण

१३ महिन्यांच्या मुलीला हाडे मोडेपर्यंत मारहाण: पिंपरी । दि. १ (प्रतिनिधी)

निर्दयी बाप, निष्ठुर आजी आणि त्यांना साथ देणार्‍या दोन आत्यांमुळे अवघ्या १३ महिन्यांची एक निष्पाप चिमुकली मरणप्राय यातना सोसत आहे. मुलगी म्हणून जन्माला येणे एवढाच तिचा दोष! मुलगी झाली म्हणून त्या चौघांनी तिला लाटण्याने मारहाण केली. तीही इतकी की तिची चार ठिकाणची हाडे मोडली आहेत. पिंपरी-चिंचवडमधील थेरगाव परिसरात हा संतापजनक प्रकार घडला. ही मुलगी पिंपरीतील एका खासगी रुग्णालयात उपचार घेत आहे. हिंजवडी पोलिसांनी संबंधित आरोपींवर मुलीला जिवे मारण्याच्या प्रयत्नाचा गुन्हा दाखल केला आहे. निर्दयी पित्याला पोलिसांनी अटक केली असून अन्य आरोपी पसार झाल्या आहेत.

दस्तगीर नजीर हुकेरी (३0, रा. डोंगरेनगरजवळ, पवारनगर, थेरगाव) असे अटक केलेल्या आरोपीचे नाव आहे. आजी सलिमा हुकेरी, आत्या शबाना शेख आणि शिरीन शेख या तिघीजणी फरार आहेत. मुलीची आई शायना दस्तगीर हुकेरी (वय २0) यांनी हिंजवडी पोलीस ठाण्यात फिर्याद दिली आहे. जिया दस्तगिर हुकेरी (वय १३ महिने) असे जखमी झालेल्या मुलीचे नाव आहे. पोलिसांनी दिलेल्या माहितीनुसार, दस्तगीर हा मूळचा कर्नाटकातील बेळगावचा आहे. वाकडमध्ये त्याचे गॅरेज आहे. त्याचा पहिला विवाह २00५ मध्ये झाला. पहिल्या पत्नीपासून दोन मुली झाल्या. वंशाला दिवा हवा म्हणून त्याच्या कुटुंबीयांनी २0१0 मध्ये पुन्हा त्याचे दुसरे लग्न लावून दिले. दुसरी पत्नी शायना यांनीही जिया या कन्येला जन्म दिला. त्यामुळे घरात त्या दोघी मायलेकींचा शारीरिक व मानसिक छळ सुरू झाला. १८ नोव्हेंबरला जिया १ वर्षांची झाली. परंतु तिच्याबद्दल दस्तगीर, आजी सलिमा आणि आत्यांमध्ये असूयाच होती.ती रडू लागली की त्या तिला आणखी मारहाण करीत. एक दिवस ती रडत असताना शायना तिला उचलून घेत होत्या. त्या वेळी सलिमा यांनी तिला ओढून घेतले. तिला लाटण्याने बेदम मारहाण केली. इसे मार डालो, लडकी नहीं चाहिए असे म्हणत दस्तगीर याने जियाचे तोंड दाबले. सलिमा यांनी तिला फरशीवर आपटले. तिला लाटण्याने मारहाण केली. शायना यांनी तिची कशीबशी सुटका केली, परंतु त्यानंतर जियाला ताप आला. तिचे अंग सुजले. तिला श्‍वास घेताना त्रास होऊ लागला, म्हणून त्या तिला दवाखान्यात घेऊन गेल्या. दस्तगीरही तिच्यासोबत गेला. ‘ती पलंगावरून पडली’ असे डॉक्टरांना सांग, असा दम भरला. मारहाणीत तिच्या दोन्ही मांड्यांमधील हाडे मोडली आहेत. उजवा हात आणि डाव्या पायाचे हाडही मोडले आहे. तिला २0 डिसेंबरला पिंपरीतील एका खासगी रुग्णालयात दाखल करण्याचा निर्णय हुकेरी कुटुंबीयांनी घेतला. परंतु, रुग्णालयात दाखल करतानाही शायना यांना पती आणि सासू यांच्याकडून धमकावण्यात आले. घडल्या प्रकाराची वाच्चता न करता, मुलगी पलंगावरून पडली असे खोटे सांगण्यात आले. मुलीवर उपचार सुरू असले तरी तिचे हाडे जोडली जाण्याची शक्यता खूपच कमी आहे. त्यामुळे तिला अपंगत्व येण्याची शक्यता डॉक्टरांनी वर्तविल्याचे पोलिसांकडून सांगण्यात आले. दस्तगीर याच्यासह सर्व आरोपींवर जिवे मारण्याचा गुन्हा दाखल करण्यात आला आहे. त्याला अटक करण्यात आली असून अन्य आरोपी फरार आहेत.

तेरी लडकी को गला दबा के मार दे
दस्तगीर याचे पहिले लग्न समरीन हिच्याशी झाले आहे. तिला मुलगा होत नसल्याने शायना यांच्याशी २६ नोव्हेंबर २0१0 रोजी दस्तगीर याचा दुसरा विवाह झाला. विशेष म्हणजे समरीन हिला स्वयंपाक येत नाही, असे खोटेच सांगून हा विवाह लावण्यात आला. त्यानंतर घरकामावरून शायना यांचा सासू व नणंदांकडून छळ होऊ लागला. गर्भवती असल्याचे समजल्यानंतर सासरकडील मंडळींकडून त्रास देणे कमी झाले. १८ नोव्हेंबर २0११ रोजी त्यांनी जिया हिला जन्म दिला. पाच दिवसांनी त्या घरी आल्या. तेव्हापासून मुलगी झाली म्हणून पुन्हा शायना यांचा छळ केला जाऊ लागला.