चौथ्या दिवशीही बंदच!

चौथ्या दिवशीही बंदच!: -
पिंपरी । दि. ११ (प्रतिनिधी)
सर्वोच्च न्यायालयाने याचिका फेटाळली, तरी एलबीटीच्या विरोधात सलग चौथ्या दिवशी व्यापार्‍यांनी बंद सुरू ठेवला. पिंपरी कॅम्पातील मुख्य बाजारपेठ वगळता शहरातील किरकोळ व्यापार्‍यांनी दुकाने उघडी ठेवली. औषध दुकाने उघडी असल्याने रुग्णांची सोय झाली. एलबीटी बंद करावी या मागणीसाठी व्यापार्‍यांनी संत तुकारामनगरात संत तुकाराम महाराजांची आरती करीत, साकडे घातले.

एलबीटीला आव्हान देणारी याचिका सर्वोच्च न्यायालाने काल फेटाळली. त्यामुळे शहरातील व्यापारी बंदमधून माघार घेण्याची शक्यता होती. मात्र, ते न होता सलग चौथ्या दिवशी शनिवारीही व्यापार्‍यांनी बंद पाळला. शहरातील मोठी दुकाने बंद होती. ऐन लग्नसराईच्या मौसमात आणि अक्षय तृतीयेच्या खरेदीसाठी पिंपरी कॅम्प बाजारपेठेत गर्दी असते. मात्र, बंदमुळे तेथे शुकशुकाट होता.