पाणीपुरवठा विभाग; ५0 जणांना नोटीस

पिंपरी : नियमित पाणीपट्टी वसुलीबरोबर पाणीपट्टी थकबाकी वसुलीत पाणीपुरवठा विभागाची पीछेहाट झाली आहे. ८२ कोटी ६८ लाखांच्या पाणीपट्टी थकबाकी वसुलीचे आव्हान या विभागापुढे आहे. या विभागाच्या कामकाजाबद्दल प्रचंड नाराजी व्यक्त करून आयुक्त श्रीकर परदेशी यांनी प्रमुख अधिकारी, अभियंते, मीटर निरीक्षक, कर्मचारी अशा एकूण ५0 जणांना कारणे दाखवा नोटीस बजावली आहे. एकाच वेळी एकाच विभागातील अनेक लोकांना नोटीस प्राप्त झाल्याने अधिकारी, कर्मचार्‍यांचे धाबे दणाणले आहे.
महापालिकेच्या चारही प्रभागांत प्रत्येकी १५ कोटींपेक्षा अधिक थकबाकी आहे. अ प्रभागात २२ कोटी ३८ लाख, ब प्रभागात २२ कोटी ७४ लाख, क प्रभागात २0 कोटी ८५ लाख आणि ड प्रभागात १६ कोटी ६१ लाखांची अशी मिळून चारही प्रभागात ८२ कोटी ६८ लाखांची थकबाकी आहे.