भ्रष्टाचार कुंडल्याच्या जंत्रीने विरोधक घायाळ

पिंपरी – रस्त्यांच्या 425 कोटी रुपयांच्या निविदा प्रक्रियेत रिंग करुन सुमारे 90 कोटींचा भ्रष्टाचार झाल्याचा आरोप राष्ट्रवादी, शिवसेनेने करत सत्ताधारी भाजपची कोंडी करण्याचा प्रयत्न केला आहे. मात्र, स्थायी समिती अध्यक्षा सीमा सावळे यांनी तत्कालीन राष्ट्रवादी कॉंग्रेसच्या कार्यकाळातील भ्रष्टाचाराच्या कुंडल्या महापालिका सभागृहात वाचून दाखवल्याने विरोधी नगरसेवकांनी सभागृहातून काढता पाय घेतला. त्यांनी टीका करणाऱ्यांची नावे उघड करत तत्कालीन स्थायीच्या सर्वच सभापतींची चौकशी करुन कोट्यवधींचा मलिदा लाटणाऱ्यांवर गुन्हे दाखल करण्याची मागणी केली. रिंग झाल्याची टीका करणाऱ्यांना रिंगा (बागड्या) घालणार आहे, असे सांगत तुम्ही डल्ला मारुन आता आमच्यावर हल्ला करु नका, असे खुले आव्हान देखील सीमा सावळे यांनी यावेळी विरोधकांना दिले.