मॉलच्या विरोधात वस्तूंवर बहिष्कार

मॉलच्या विरोधात लढण्यासाठी किराणा व्यावसायिकांनी वस्तूंवर बहिष्कार घालण्याचे ठरवले आहे. मॉल हे कंपन्यांकडून मोठ्या प्रमाणात माल घेत असल्याने त्यांना स्वस्तात माल दिला जातो. तोच माल किराणा व्यावसायिकांना अधिक किमतीमध्ये दिला जातो. स्वस्तात मिळालेल्या वस्तू मॉलकडून स्वस्तात विकल्या जात असल्याने किराणा दुकानांचा ग्राहक मॉलकडे वळत आहे. त्यामुळे किराणा व्यावसायिकांनी अशा वस्तूंवर बहिष्कार घालण्याचे शस्त्र उपसले आहे. पुणे जिल्हा रिटेल व्यापारी संघाने बुधवारी पत्रकार परिषदेत ही घोषणा केली.