दत्ता सानेंची अस्तित्वासाठी ‘कोल्हे कुई’, सत्तारुढ पक्षनेता एकनाथ पवार यांचा ‘टोला’

पिंपरी (Pclive7.com):- पिंपरी महापालिकेत राष्ट्रवादी काँग्रेसची सत्ता असतानाही दत्ता साने यांनी सातत्याने स्वत:च्या पक्षाविरोधात गरळ ओकण्याचे काम केले होते. तेव्हाही त्यांची ‘डाळ’ शिजली नाही. त्यानंतर राष्ट्रवादीची सत्ता जाऊन कोणीही प्रभावी पदाधिकारी आणि स्थानिक नेता नसल्याने दत्ता साने यांच्याकडे महापालिकेतील विरोधी पक्षनेतेपद आले आहे. मात्र कोणत्याही विषयाचा सखोल अभ्यास नसल्याने त्यांच्याकडे  मुद्दा नाही. त्यामुळे विरोधी पक्षनेता म्हणून स्वत:चे अस्तित्व डळमळीत होऊ नये म्हणून त्यांच्याकडून सातत्याने आरोप केले जातात. साने यांचे हे आरोप म्हणजे केवळ ‘कोल्हे कुई’ आहे, असा टोला महापालिकेचे सत्तारुढ पक्षनेता एकनाथ पवार यांनी केला आहे.