१४ दिवसांत १४ आत्महत्या

१४ दिवसांत १४ आत्महत्या: पिंपरी । दि. २ (प्रतिनिधी)

शहरात गेल्या दोन आठवड्यांत १४ जणांनी मृत्यूला कवटाळून आपली जीवनयात्रा संपविली आहे. हादरवून टाकणार्‍या आत्महत्येच्या घटनांमुळे हसती खेळते कुटुंब उद्ध्वस्त होत आहेत. वाढत्या आत्महत्या रोखण्यासाठी समुपदेशन सत्रांचे आयोजन करण्यात येणार असल्याची माहिती पोलीस उपायुक्त शहाजी उमाप यांनी दिली आहे.

धनंजय शंकर कंटक (२७, रा. प्राधिकरण, निगडी) यांनी गुरुवारी रात्री साडेआठला राहत्या घरात गळफास घेऊन आत्महत्या केली. गेल्या पंधरा दिवसांत घडलेल्या आत्महत्यांचा आढावा घेतला असता त्यात सर्वांधिक प्रमाण तरुणाईचे आहे. महाविद्यालीन विद्यार्थी, विद्यार्थिनी एकाएकी आत्महत्येसारखा टोकाचा निर्णय घेत असल्याने पालकवर्ग धास्तावला आहे. गेल्या चार दिवसांत दररोज किमान दोघांनी स्वत:हून मृत्यूला कवेत घेतल्याच्या घटना घडल्या आहेत.