जीव वाचविणाऱ्यांची दखलच नाही

पुणे - बाणेर येथे या वर्षी फेब्रुवारीत झालेल्या अपघातात नीलय पाटील गंभीर जखमी झाला होता. त्याची शुद्ध हरपत होती, तेवढ्यात देवेंद्र पाठक या नागरिकाने त्यास रुग्णालयात हलवून त्याचे प्राण वाचविले. अपघातातील जखमींना मदत करण्याकडे अनेक जण दुर्लक्ष करतात, मात्र देवेंद्र यांच्याप्रमाणे काही जण पुढेही येतात. अशा पुढे येणाऱ्या व्यक्ती, संस्थांना प्रोत्साहन मिळावे, जखमींचे प्राण वाचविण्यासाठी मदतीचे हजारो हात पुढे यावेत म्हणून राज्य सरकारने  मदत करणाऱ्यांना लाखो रुपयांचे बक्षीस देण्याचा अध्यादेश २०१४ मध्ये काढला. त्यास आता चार वर्षे उलटली, पण मदत करणाऱ्यांचा एकही प्रस्ताव चार वर्षांत पुणे पोलिसांकडून राज्य सरकारकडे गेलेला नाही, हे दुर्दैव !