अपुरी बससेवा, वडापची चलती

किवळे : देहूरोड-कात्रज बाह्यवळण महामार्गावर पीएमपी बसच्या अपुर्‍या बससेवेमुळे सहाआसनी रिक्षा, वडापवाल्यांची आणि खासगी वापरासाठी नोंदणी केलेल्या वाहनांची चलती असून, क्षमतेपेक्षा अधिक प्रवासी भरण्यात येऊन सर्रास धोकादायक वाहतूक केली जात आहे. प्रवाशांना कमी वेळेत आणि बसच्या अगोदर इच्छित स्थळी पोहचता येत असल्याने वडापमधून व सहाआसनी रिक्षांतून जाण्यास प्रवासी प्राधान्य देतात. मात्र, सहा आसनीत व वडापमध्ये जागा नसली, तरी जादा प्रवासी कोंबून, क्षमतेपेक्षा दुप्पट प्रवाशांची वाहतूक होत असल्याचे निदर्शनास येत आहे. या ३४ किलोमीटर मार्गावर सुमारे तीनशे अवैध वाहने वाहतूक करीत आहेत.