दिघीकरांना मिळणार माफक दरात भाजीपाला

शेतकरी आठवडे बाजारचे रविवारी उद्घाटन 

पिंपरी : महाराष्ट्र राज्य कृषी पणन महामंडळ यांच्या सहकार्याने जगदंब अ‍ॅग्रोटेक फार्मर्स प्रोड्युसर कंपनी, नगरसेवक विकास डोळस आणि कुलदीप परांडे यांच्या संयुक्त विद्यमाने दिघीत शेतकरी आठवडे बाजारचे दर रविवारी आयोजन करण्यात येणार आहे. यामुळे दिघीकरांना ताजा आणि माफक दरात भाजीपाला मिळणार आहे, अशी माहिती नगरसेवक विकास डोळस यांनी दिली. दिघीतील, पोलाईट पॅनोरमा रोड येथे दर रविवारी दुपारी तीन ते रात्री नऊ या वेळेत ‘शेतकरी आठवडे बाजार’ भरणार आहे. सायंकाळी साडेपाच वाजता या उपक्रमाचे भोसरीचे आमदार महेश लांडगे यांच्या हस्ते उद्घाटन करण्यात येणार आहे.