चिंचवड ते रायगड सायकल वारी

वाकड – पिंपरी-चिंचवड शहरातील उच्च शिक्षित तरूण-तरुणींनी चिंचवड ते रायगड 135 किलो मीटर सायकल रॅली काढली. हंटर्स ट्रेकिंग अँड सोशल क्‍लबकडून या रॅलीचे आयोजन करण्यात आले होते. स्वातंत्र्यदिनी हा उपक्रम हाती घेण्यात आला होता. यामध्ये क्‍लबच्या विविध वयोगटांतील 50 तरुण-तरुणींनी स्वत:हून सहभाग नोंदवला होता. सकाळी पाच वाजता थेरगावमधील डांगे चौक येथून शिवाजी महाराजांच्या पुतळ्यास प्रणाम करून रॅलीला सुरुवात झाली. हिंजवडी, माण, पिरंगुट, पौड, ताम्हिणी घाट, निजामपूर मार्गे मुसळधार पावसात अवघड, चढ-उतार पार करत निसर्गरम्य वातावरणाचा आनंद घेत रॅली रायगडावर पोहचली. रायगडच्या पायथ्यास राजमाता जिजाऊंच्या समाधी स्थळी नममस्तक होऊन सायंकाळच्या वेळेस रॅलीची सांगता करण्यात आली.