खिळेमुक्त झाडांबाबत पालिका प्रशासनाची कारवाई शून्य

निगडी :अंघोळीची गोळी आणि इतर सामाजिक संस्थांमार्फत ‘खिळेमुक्त झाड’ हे अभियान गेले 8 महिन्यांपासून शहरात प्रभावीपणे सुरू आहे. काल प्राधिकरणातील सी.एम.एस. शाळेसमोरील रस्त्यावर हे अभियान राबवण्यात आले. शाळा असल्यामुळे इथे एका एका झाडावर 5 ते 6 क्लासचे बोर्ड अनधिकृतपणे लावण्यात आले होते. या 20 झाडांवरचे जवळपास 50 खिळे आणि तारा आणि 30 बोर्ड काढण्यात आले. स्मार्ट सिटी आणि स्वच्छ शहर म्हणून पिंपरी-चिंचवड हे शहर पुढे येत असताना झाडांवरचा कचरा मात्र प्रशासनाला दिसत नाही. नगरपालिकेत उद्यान आणि आकाश-चिन्ह विभागाकडे हवा तेवढा कर्मचारी वर्ग नसल्यामुळे कारवाई होत नाही. त्यामुळे फ्लेक्स, बॅनर आणि खाजगी क्लासच्या जाहिरातींमुळे शहर बकाल होत चालले आहे.