पवना धरणातून 4785 क्यूसेक वेगाने पाण्याचा विसर्ग

नदी काठच्या गावांना सावधनतेचा इशारा

वडगाव मावळ : गेल्या काही दिवसांपासून पवना धरण परिसरात सुरु असलेल्या जोरदार पावसामुळे धरणातून 4785 क्यूसेक या वेगाने पाणी नदीपात्रात सोडण्यास सुरुवात केली आहे. त्यामुळे पवना नदी दुथडी भरून वाहू लागली असून नदीकाठच्या गावांना सतर्कतेचा इशारा देण्यात आला आहे. पिंपरी-चिंचवडकरांसह मावळवासियांची तहान भागविण्यारे पवना धरण ऑगस्ट महिन्याच्या पहिल्या आठवड्यात 100 टक्के भरले आहे. त्यामुळे शहरवासीयांसह मावळ परिसरातील नागरिकांचा वर्षभराचा पाण्याचा प्रश्‍न संपला आहे. एक जूनपासून 2774 मिमी पाऊस धरण परिसरात झाला आहे. गतवर्षी आजच्या तारखेला 2582 मिमी पाऊस झाला होता.