रिक्षाप्रवास मीटरप्रमाणेच

पिंपरी - आपण कधी पुण्यात रिक्षाने प्रवास केला तर, मीटरप्रमाणे भाडे द्यावे लागते. पिंपरी-चिंचवड शहरात मात्र रिक्षाचालक सांगेल तेच भाडे द्यावे लागते. पुण्याचे जुळे शहर, औद्योगिक शहर, श्रीमंत महापालिका अशी बिरुदे मिरविणाऱ्या शहरात हा विरोधाभास का, असा प्रश्‍न निश्‍चित उपस्थित होत होता. मीटरसक्ती असूनही लागू होत नव्हती. रिक्षाचालक, संघटना, पोलिस, आरटीओ या यंत्रणाही ती लागू करण्यास तयार होत्या. तरीही प्रवाशांकडून मनमानी पद्धतीने भाडे आकारले जायचे. आता गुरुवारपासून (ता. १४) मीटरसक्तीची कडक अमंलबजावणी पोलिसांनी सुरू केली आहे.