मोशी टोलनाक्यावर दररोज सायंकाळी वाहतूक कोंडी!

पुणे-नाशिक महामार्गावर लागतात वाहनांच्या लांब रांगा

पिंपरी-चिंचवड : पुणे-नाशिक राष्ट्रीय महामार्गावर दररोज सायंकाळी पाच ते आठ या दरम्यान मोशी टोलनाक्याच्या भागात वाहतुकीची कोंडी नित्याचीच  झाली आहे. नाक्यावर धीम्या गतीने चालणार्‍या वाहतुकीमुळे सुमारे एक किलोमीटरपर्यंत म्हणजे चिंबळी फाट्यापर्यंत दररोज वाहतूक कोंडी  होत आहे. टोल नाक्यावरील वसुलीत होणार्‍या वेळेच्या अपव्ययाने रुग्णवाहिका, एसटी बस, पीएमपीएमएलच्या बसेस, कामगार, विद्यार्थी  येथील कोंडीत अडकतात. या समस्येकडेही प्रशासनाने लक्ष द्यावे, अशी मागणी प्रवासी, वाहनचालक आणि नागरिकांनी केली आहे.